BIEMH-Makina-Erremintaren Nazioarteko Biurtekoa edukiz eta jardueraz betetako agenda zainduarekin itzuli da edizio honetan. Uneotan, eta bikaina izan den lehen egunari amaiera emateko, Get Together ekimena egiten ari dira. Networkinga egiteko eta giro informalean lankidetza-aukerak bultzatzeko enpresa erakusketarientzat modu esklusiboan prestatutako ekimena da eta zuzeneko musika, koktela eta emanaldi bereziak biltzen ditu.

Bihar BIEMH Talks izenekoen txanda iritsiko da. Bertan, hitzaldien, keynote oharren, workshopen eta mahai-inguruen bidez, industriaren gaur egungo egoera eta etorkizuneko proiekzioak aztertuko dituzte. Hiru egunez jarraian egingo dira hiru bloketan banatuta: Digital Talks elkarrizketek eraldaketa digitalerako punta-puntako 4.0 teknologiak arakatuko dituzte; Automation & Robotics Talks izenekoek industriara aplikatutako robotikako eta automatizazioko berritasunak eta garapenak aurkeztuko dituzte; eta, azkenik, Additive Talksek teknologia aditiboaren ezarpenarekin, erronkekin eta bilakaerarekin lotutako gaiak azpimarratuko dituzte.

Agendak, gainera, BIEMH Tours bisita gidatuak biltzen ditu: Big Machines Tour, Automation & Robotics Tour eta Innovation Tour. Horrez gain, BIEMH TV bihar hasiko da, zuzeneko 50 elkarrizketa baino gehiagorekin, jardunaldien gaineko laburpenekin eta azterketekin, eta sustapen-bideoekin.

Bestalde, eta formatu irekiarekin eta dinamikoarekin, BeDIGITALen Innovation Workshops tailerrek aurrerapen digital esanguratsuenak erakutsiko dituzte. Gainera, Innobasqueren – Berrikuntzaren Euskal Agentziaren Innotech Area by Innobasque eremuan, ikerketako eta berrikuntzako proiektuak ezagutaraziko dituzte, eta asteazkenera arte hitzaldietara joateko aukera egongo da.

Halaber, gaurtik hasi eta asteazkenera arte, Women in Industry jardunaldiak egingo dira. Enpresa esparruko genero-berdintasunaren eta lidergo partekatuaren beharrari buruzko eztabaida egiteko gunea da. Helburu nagusia da industrian eta teknologian berdintasunarekin eta generoaren lidergo orekatuarekin lerrokatuta dauden eta neurgarriak, sinesgarriak eta anbizio handikoak diren helburuak ezarrita, erakundeak bizkorrago aurrera egitera bultzatzea eta erronka hori sortzea

Amaitzeko, hilaren 5ean, asteazkenean, Bilboko erdigunean BIEMH Fest izenekoa egingo da. Herritarrei zabalik egongo den ekimena da eta, zalantzarik gabe, azokan izandako esperientzia aberasteko balioko du.